ஜி.வி.பிரகாஷ் இசையமைக்கும் 50வது படம்

வசந்தபாலன் இயக்கிய, ‛‛வெயில்'' படத்தின் மூலம் இசையமைப்பாளராக அறிமுகமானவர் ஜி.வி.பிரகாஷ் குமார். ஏ.ஆர்.ரஹ்மானின், சகோதரியின் மகனான ஜி.வி., குறுகிய காலத்திலேயே முன்னணி இசையமைப்பாளராக உயர்ந்தார். இசையமைப்பாளராக மட்டுமல்லாது, தயாரிப்பாளராகவும், நடிகராகவும் மாறியிருக்கும் ஜி.வி.பிரகாஷ், இப்போது நடிப்பு, இசையமைப்பு என பிஸியாக இருக்கிறார்.

இந்நிலையில், ஜி.வி.பிரகாஷ், தனது 50வது படத்தின் இசையமைப்பிற்கான படத்திற்கு கையெழுத்திட்டுள்ளார். அந்தப்படம் நடிகர் விஜய் நடிக்கும் படம். ராஜா ராணி படத்தின் மூலம் இயக்குநராக அவதரித்த அட்லீ, தனது அடுத்தபடத்தை விஜய்யை கொண்டு இயக்குகிறார். தற்போது விஜய் கத்தி படத்தை முடித்துவிட்டு, சிம்புதேவன் படத்தில் நடிக்க தயாராகிவிட்டார். இதனையடுத்து அட்லீ இயக்கும் படத்தில் நடிக்கிறார் விஜய். விஜய்-அட்லீ-ஜி.வி.பிரகாஷ் இணையும் படம் அடுத்தாண்டு அதாவது, 2015-ல் துவங்க இருக்கிறது.

சமீபத்தில் தான் 25வது படத்திற்கு இசையமைத்தார் ஜி.வி, அதற்குள் இந்த இரண்டு ஆண்டுகளில் அவர் மேலும் 25 படங்களுக்கு இசையமைத்துள்ளது, அனைவரையும் ஆச்சர்யத்தில் ஆழ்த்தியுள்ளது.